給阿嬤的情書

純從電影角度看, 此作故事性强, 劇情編排出色。最成功嘅係演員, 外型夠哂草民, 演出亦到位。電影除溫情外，亦有點黑色幽默，亦對當年社會狀況有不俗嘅描繪，都係挖番啲陳年舊事出嚟話舊屎，細個已聽唔少。PS.• 印象中以前都好似睇過類似戲軋嘅故事作品 🤔• 客觀嚟講，套戲拍得唔差，但我又冇覺得好感動，因為呢類故事題材，漂洋過海劇情，喺好多電影/電視劇都睇過哂。事實我睇果場都冇聽到人索鼻。• 入場見到好多都係長者

令我諗起《我的父親母親》，亦都開咗眼界，原來以前華僑係咁樣，唔知內容有幾多係真實，不過係拍得真摯，亦唔造作煽情谷人熱淚，說感動談不上，但都係一部好電影，值得一看

很難得有呢種全套電影都以潮洲話做對白的電影，現時很多地方的方言，都漸漸消失。呢套戲係各方面，都滲透住潮洲文化，不過對我來說有幾點意見- 兩個女主角年青時都很漂亮，但樣貌太相似，缺乏特色- 男主角好似太文弱書生，我覺得從故事情節來說，男主角應是個身體強壯，但又相對靚仔嘅人物，應該係好打得- 照故事劇情來說，我覺得男主角可能開始到南洋時是拉車的，但應該是幫派中人，第一次入獄時，在外仍有咁多債要收，入獄前其實佢主要工作應該係放債- 在監獄遇到的貴人，當然亦是撈偏門的，因男主角打得，勇悍，所以得到貴人相助，幫手做風險更高亦更賺錢嘅工作，結果因為工作死了- 咁可能因為安家費，撈偏時賺落嘅錢加上幫派兄弟嘅支援，先可以一直寄錢回老鄉- 以鄭枝南及男主角嘅交情，好難有說服力，要自己辛苦工作，去供養男主角嘅家庭咁耐整體來說，故事不錯，也沒有刻意去煽情。故事劇情與細節都好符合我對那個年代的潮州人嘅印象。- 普遍都係窮- 非常慳儉- 有拼搏精神，比較願意去外地工作- 在異地工作嘅情況下，潮洲人團結，有義氣- 那個年代，普遍都生好多個子女，一對夫婦隨時可以生十個八個，現今嘅世代難以想像- 好有創業心，很想做老闆，寧願開個檔口自己做小生意都唔想幫人打工- 宗教氣息濃厚，喜歡拜神，着重安葬，祭祀先人，某程度上，淑柔去泰國，可能對佢嚟講最重要嘅原因，就係攞返個先人名牌回鄉- 老一輩鍾意睇潮州劇，有啲似粵劇，唔識潮州話就睇唔明

係嘅，呢套戲拍得好樸實、好鄉土情懷、好有故事性、好感人賺人熱淚，素人演員有啲演得幾好但有啲又似一套舞台樣版劇。但係感動過後，用腦諗一諗，究竟睇咗咩國家、歷史背景嘅劇情呢？本片描述由二戰後（1945），一對年輕愛侶相愛、私奔、成家、生育兒女，然後生活迫人，丈夫要去南洋做華工，去捱豬仔，幾十年一直寄戲中所講嘅僑批連錢，甚至禮物、食物返回潮洲鄉下，去養家，然後講到丈夫捱苦之餘，同一班同鄉，點樣喺泰國過著「七十二家房客」式互助互保、同甘共苦、提拔後輩等等嘅生活，丈夫更「仗義每當屠狗輩」式命都不顧去保護同胞，而已落地生根嘅華僑點樣出錢出力去收留、庇護班華工，簡直係「堅記車房」、「和平飯店」式嘅熱血江湖兒女….但係由赤化以後嘅大陸，經過大飢荒、大躍進、土改、三反五反、文化大革命…. 呢幾十年歷史，亦正正係成套戲主要劇情橫跨嘅時期，稍微了解個現實狀況，就知道嗰啲鄉村生活、人情世故係同部戲所描繪出來嘅，好似另一個時空咁樣，以前已經落咗嚟香港嘅阿公阿婆一代，佢哋講過要寄信返鄉下，或者一啲包裹，係會寄去「公社」，由大隊接收，驗過，甚至睇過啲信，先俾返收信人，錢就一定要幾經轉折，由港幣兌換外滙券，再由人民大隊嘅財務單位換成人民幣，而且有好多限制，寄「咸豬肉」？唔好玩啦，嗰時所有物資，柴米油鹽，係配給嘅，按人口單位分發米票、肉票、油票、糧票…俾村民，所有物品入境，進到鄉鎭，全部有監管，我哋細個跟阿婆「返鄉下」，就係幫手著幾件衫幾條褲，當自己身上衣物咁樣返去除低俾鄉下嘅人，總之完全同部戲顯示出嚟嘅，係兩個唔同嘅宇宙。睇完部戲，比對番台灣片「大濛」，其實好似兩生花咁，唔可以話大濛先係貼近真實歷史背景面貌，大家都有熱血同胞精神同溫情，但至少大濛會講個主角三輪車伕會為錢去殺人，啲鄉民有土匪大賊，唔係全部兩脅插刀義氣仔女。冇特別去深究阿嬤的情書係咩幕後背景人士去拍攝或者有咩隱藏目的或議題，總之深想一層，睇完只可以話呢啲情書其實只係童話故事，幫手重塑一段美麗動人但係空洞無血肉嘅歷史。